Gjatë një aktiviteti në Çarshinë e Shkupit, kandidati presidencial nga partia VLEN, Arben Taravari, u pyet për rastin “Monstra”. Taravari zbuloi se ekzistojnë përgjime të pa dëgjuara deri më tani për këtë rast. Ai shtoi se është e nevojshme të fillonjë një procedurë që do të vërtetojë pafajësinë e të burgosurve. “Ndoshta ju kujtohet diskutimi ndërmjet Jankulloskës dhe Miallkovit ku thuhet se nuk mund t’i lirojmë, edhe pse ata janë të pafajshëm, sepse do të shembet sistemi. Ne duhet të merremi seriozisht me këtë sistem, pasi shumë njerëz janë të burgosur pa arsye, pa asnjë faj. Unë nuk po përcaktoj një afat të caktuar, por si autoritet, do të bëj presion që çështjet të zgjidhen sa më shpejt. Nuk bëhet fjalë për falje, por për sjelljen e drejtësisë për këta njerëz dhe për të kërkuar falje nga shoqëria dhe shteti, madje dhe për t’u kompensuar”, raportoi SHENJA, sipas fjalëve të Taravarit. Ai shtoi se shumë kanë folur për këtë rast, por pak kanë vepruar në të vërtetë. Taravari gjithashtu theksoi se ndryshimet që do të ndodhin më 8 maj do të sjellin reforma thelbësore në shoqëri dhe shtet.