Kryeministri Mickoski njoftoi se do të forcojë lidhjet me Akademinë e Shkencave dhe Arteve të Maqedonisë, e cila, sipas tij, do të luajë një rol kyç në hartimin e një strategjie për zhvillimin e shtetit deri në vitin 2050. Për këtë plan të rëndësishëm ai kërkoi mbështetje nga të gjitha forcat politike.

“Na duhet një strategji gjithëpërfshirëse që të përcaktojë drejtimet e ardhshme të zhvillimit të shtetit modern. Ne duhet të shfrytëzojmë potencialin intelektual të gjithkujt që mund të kontribuojë dhe të punojmë së bashku për të vendosur objektiva afatgjata për të ardhmen e vendit. Më pas, do të kërkoj një konsensus të gjerë politik për miratimin e kësaj strategjie. E di që mund të lindin debate në publik mbi Akademinë, prandaj e theksoj: shkenca, qëllimet dhe strategjitë nuk duhet të ndahen në baza etnike,” tha kryeministri Hristijan Mickoski.

Deklarata e Mickoskit për mosndarjen etnike dhe fuqizimin e ASHAM-it vjen në një moment kur VLEN-i, partneri i tij në qeveri, kërkon mbështetje për financimin dhe kornizën ligjore për një Akademi Shqiptare. Edhe pse zv.kryeministri Izet Mexhiti kohët e fundit sugjeroi se kjo iniciativë ishte një përpjekje për të rritur përfaqësimin e shqiptarëve në ASHAM, Mickoski është duke kërkuar mbështetje edhe nga opozita, përfshirë LSDM-në, për planet e tij.

“Për këtë arsye, le të mendojmë strategjikisht dhe në të mirën e përgjithshme të shtetit. Kjo periudhë është e një rëndësie kritike, besoni. Do të shihet nëse ne do të përparojmë apo jo. Mund të duket dramatike ose patetike për disa, por e vërteta është se nëse synojmë suksesin, bashkëpunimi është i vetmi rrugë. Dhe duhet të fillojmë tani. Qasja sipërfaqësore ndaj politikës na ka sjellë këtu,” shtoi Mickoski.

Përkujtimi i 23 tetorit, që shënon ditën e luftës revolucionare maqedonase, nuk përfshiu elemente shqiptare. Nuk kishte as fjalime, as përmbajtje në gjuhën shqipe, dhe kori i Operës dhe Baletit interpretoi vetëm këngë patriotike maqedonase, pa asnjë performancë në gjuhën shqipe.