Presidentja e Kosovës, Vjosa Osmani, ka shprehur revoltën e saj ndaj vrasjes së një gruaje 21-vjeçare në Ferizaj, të vrarë nga ish-bashkëshorti i saj, duke e quajtur ngjarjen si femicid. Në një postim në Facebook, të cilin e ka transmetuar Telegrafi, Osmani theksoi nevojën për një zgjim të shoqërisë për të luftuar këtë fenomen shkatërrues.

“Ky rast na kujton se vrasësit që synojnë të shkatërrojnë jo vetëm jetën e grave por edhe thelbin e shoqërisë sonë mund të ndalohen vetëm nëse bashkohemi dhe zgjohemi si shoqëri kundër këtij fenomeni të tmerrshëm”, shkroi Osmani.

Ajo gjithashtu kritikoi sistemin e drejtësisë për mënyrën se si trajtohen këto raste, duke bërë thirrje për fundin e dënimeve të lehta dhe dështimeve të institucioneve që duhet të mbrojnë gratë: “Mjaft më me dënime qesharake. Mjaft më me një sistem të çalë të drejtësisë. Mjaft më me dështim të shtyllave që duhet të mbrojnë gratë tona, qytetarët tanë.”

Osmani shprehu ngushëllimet e saj për familjen e viktimës dhe kërkoi dënimin maksimal për autorin e krimit.

Sipas raporteve të policisë së Kosovës për rajonin e Ferizajt, ngjarja tragjike ndodhi në Qendrën për Punë Sociale në Ferizaj më 12 prill, ku vëllai i mitur i viktimës u plagos gjithashtu. Të dyshuarit për këtë akt, ish-bashkëshorti i viktimës, 36-vjeçari V.A, u arratis nga vendi i ngjarjes por më vonë u arrestua nga autoritetet.

Viktima, e identifikuar vetëm me inicialet E.C, vdiq në vendngjarje, ndërsa vëllai i saj, D.C, 15 vjeç, u dërgua në Qendrën Emergjente në Ferizaj dhe raportohet të jetë jashtë rrezikut për jetë.

Ky rast ka shkaktuar reagime të shumta, duke përfshirë ato nga kryeministri Albin Kurti, ministrja e Drejtësisë Albulena Haxhiu, liderë të partive politike, dhe aktivistë të shoqërisë civile, të cilët kanë dënuar ashpër këtë akt dhe kanë bërë thirrje për masa më të rrepta ligjore.